دارميات الى اهل السماوه

ريشه بوسط ريشات جنحك اخذني
وبرض السماوه هناك ياطير ذبني
****
رچـفه وطحت للـگـاع هزتني الاشواگ
لرض السماوه الروح والـگـلب مشتاگ
****
هـم ابكبـر دنياك هـم السماوه
خلّصت عمري وياه دوم انتلاوه
*****
لرض السماوه جـروح بـگـيبي عـچـله
للشـرجي والمـشواچ وارض السـكـله
*****
ما ينوصـف ياناس هـم العليه
چـي عفت آنه احباب بالحيدريه
****
هالليله دمـع العـين عـمدن لوشله
حـن الدليل اشتاگ لرضـچ يقشله
****
انخـه الله يا هالناس بالنبي وآلـه
ارجـع واشـم زهـور حي الرساله
****
حـط الـگـلب يا طير بجناحك وطير
وبس ساعـه وچـر بيه بم العصافير
****
رفرف بـگـلبي وطير ، خلني بمـچـاني
وذبه انته ساعـه هـناك يم گـاع باني
****
حيل ارد ادگ عالراس خلوني ابجي
صاعـد بـگـلبي الشوگ لـگـاعك يشرجي
****
بجاه الله والكرار والحر والاكبر
لرض السماوه انعود مارايد اكثر
****
اهـل الكرم والطيب اهل المحنه
بالشده جرب شوف اهل المثنى
****
للشرجي واهله البيه واهل الكرامه
صار بسويد احشاي الهم علامه
****
للغربي والدبات والحيدريه
گـامـت توج النار هالساعه بيه
****
للغربي لو رديت بخير وسلامه
عمدن لصب ادموع يم الكرامه
****
اطبج نهاري وياه لو ليلي گـصّر
الطم وانوح عليك ياجسـر الأخضـر
****
ناذر نذر ياناس وشاهدي الساده
ارگـص لون رديت يم العياده
****
ارد انخه آنه الناس من اهل الولايه
تبوسلي وبحيطان عـجـد العرايه
****
بجاهـك يباب الجـود جعفـر الصادق
روحي ترد فـد يـوم لعـجـد الفنادق
****
لشخصك يداحي الباب اشـكي الهظايم
هم ترد عيني اتشوف گـاع اهل ناظم
****
روحي اصبحت ياناس تكسر الخاطر
مشتهيه غبشه اتظوگ شوربة مسافر
****
ياهو اليـگـول بعيد عن السماوه
هذا آنه بالاحلام اسبح بساوه
****
لحد يـگـلي اشبيك من اگـعـد ابـچـي
حمل ارد اذب هموم يم الشكرچـي
****
بالغـسل والبستان عونه الـگـعد يوم
وبين النخل ياناس فرغهه الهموم
****
كل الشباب هناك ملتمه صوبين
ياهو التريده اتشوف بـگـازينة حسين
****
حـگـه اليحن ياناس بالحسره يشحط
جنـه وتـگـول هناك بالقشله عالشط
****
مختاضه روحي وياي والـگـلب مختاض
چـين اشتهيت اليوم كبة ابو رياض
****
جرحي يطيب بساع تنخمد ناره
بالاخص لو رديت يم التجاره
****
للسكك هزني الشـوگ وچ ناره بيـه
وخلاهه كـوره تـگـول هاي المسيه
****
چـن جنه عيني اتشوف والحوري اتطير
اشمحلاهه من تفوت بسـوگ النجاجير
****
لجسر الخشب مشتاگ ولدوبته النوب
مشتهي گـعـده هناك وي خيط الغروب
****
تسوه الهند والصين والغرب كله
شمحلاهه من اتفوت بسوگ السـكله
****
يرگـص دليلي اليوم والعـگـل چـن خف
چـي هزته الاشواگ لسوگ المسـگـف
****
يالغربي هاي الروح عـتتني الك عـت
وانـگـر تـد گ تريد يم ابو الشربت
****
جـنه الرميثه اتـگـول مامش مثلهه
فايز وحـگ عيناك من يرجع الهه
****
روحي آنه للأحزان صارت وريثه
من فارگـت ياناس گـاع الرميثه
****
لكل كتر منهه اشتاگ لافشله لا عـيب
ماچـذبت مشتاگ لسوگ الـگـصاصيب
****
نعلعله ابو صدام نعلعله عـفـلـق
حـرّموا عيني اتشوف جسـر المعـلق
****
گـلبي حمامة شـوگ وبشوگـه هايم
كـوّن يريد ايـبات عـد الظـوالـم
****
النخل السماوه اشتاگ صبح ومسيه
هـم نـرد نــگـعـد يـوم باليهـوديه
****
للمجد والوركاء والخضر آنه
وگـاع الرميثه ااشتاگ ودرب الحضانه
****
رفرف جناح الشوگ ماخـذني بيده
ياكل كباب ايريد ابمطعم عبيده
****
گـص رايد بعشتار بيه العوافي
يادهر كافي افراگ يادهر كافي
****
روحي وشيعه الشـوگ خلبصهه خلبوص
چـين اشتهـت هاليوم سمـچـات حلبوص
****
ياطير اخذ وياك گـلبي وديعه
وبالغربي ذبه هناك يم الطليعه
****
صـبّحت روحي اليوم تضحك سعـيده
چي حـدرت بالطيف يم الجديـّده
****
شـوگـي آنـه من جبال طاح وتدربه
للقشله للبستان يم عبد ربه

كرم لطيف
KARAM592@YAHOO.COM
*********
بجاه الله والكرار والما شرب ماي
لرض السماوه انعود طلبتنه بس هاي
****
هم ونرد ياناس ونشوف اهلنه
ونكحل العنين برض المثنى
****
عل الشرجي والطيبين روحي التون دوم
عافت لذيذ الزاد بس تجرع اسموم
****
مو مستحه ولا عيب لاهيه فشله
اليتبرك بطينات جرفـچ يقشله
****
غمـگ جروحي وحيل لظلوعي كسر
من گـصه وياك البين يا جسر الاخضر
****
حبـچ ابنص احشاي انطبع تصوير
يمته افرح بملـگـاچ يم العـصافير
****
ارد انشد ابن جعاز واستمـع رايه
هم ترد عيني تشوف عـجد العرايه
****
للقشله مـر يا طـير بلغ التحـيه
وخبرهه ساهي العين يشـچـي الأذيه
****
الدهر شل عظاي طبرني تطبير
من كثر وني عليك سوگ النجاجير
0000000
000000
0000
تدري شـكثر مشتاگ لهل السماوه
بكـثر مـاي البات بنبـع سـاوه
**